عجبي عليكي يا دنيا

عجبي عليك يا دنيا ياما فيكي ناس قاسيين
سرقاهم انتي يا دنيا وهما مش حاسيين
وهيفضلوا طول عمرهم ماشين مع الزحمه
نازلين في ظلم الناس والذل في المساكين
**
عجبي عليه المعلم قاعد في وسط السوق
والناس عليه بتسلم وهو باصص فوق
كانه فوق الناس ولا عمره كان منهم
والقرش هو حبيبة لو حتى كان مسروق
*
وكل ما فلوسه تكتر يعلى كمان وكمان
ويمشي بين الخلايق وكأنه مش انسان
واتجوز بنات كتير من اهلهم اشتراهم
وزي ما خدهم رماهم ولا خافش من الرحمن
*
وكمان خدته الجلاله وعمل ليه قعدة
لم حواليه الزباله من نفوس فاسده
وقعد يقول ويقول عن قوته وجبروته
ونسى انه العبيط انسان ملوش لازمه
*
خارجه الجنازة بتاعتة اصل المعلم مات
وعملوا حته صوان يساع لناس الوفات
لكنه حانت دفنته والناس شايله جتته
طلعوها بالكفن ونزلوه ويا الرفات
**
لا نفع ماله ودهبه مبقاش لهم قيمه
كان قاعد في وسط الناس بيشد في الشيشه
في ثانية وفي شهقه واحده طلعت خلاص روحه
وكده مات المعلم وخلصت الليله
**
عجبي عليه المعلم ملفوف عليه كفنه
بطل خلاص يتكلم والدود خلاص عدمه
وبقه في النهاية تراب في التربه مش قصره
وافقر مساكين البشر نايميين هنا جنبه